Куни кеча Давлат раҳбари раислигида ўтказилган видеоселектор йиғилишида маҳалла тизимини янада такомиллаштириш, жойларда ишларни самарали ташкил этиш, ҳудудларни ободонлаштириш ҳамда маҳаллаларда тозалик ва озодаликни таъминлаш масалаларига алоҳида эътибор қаратилди. Йиғилишда бу борадаги аниқ вазифалар белгилаб берилди. Шу муносабат билан жорий йилнинг 15 октябридан мамлакатимиз бўйлаб тозалик ва озодалик ойлиги бошланди. Бугун Бағдод тумани марказида ушбу ойликни самарали ва уюшқоқлик билан ўтказиш, барча маҳаллалар, мактаб ва мактабгача таълим муассасалари, кўчалар ҳамда аҳоли турар жойлари ҳудудларида тозалик ишларини амалга ошириш бўйича йиғилиш ўтказилди. Йиғилишда туман ҳокимлиги, туман прокуратураси, ички ишлар бўлими, Миллий гвардия ҳамда Экология бўлинмаси мутасаддилари иштирок этиб, тозалик ва ободонлаштириш тадбирларини тизимли ва изчил амалга ошириш юзасидан тушунчалар беришди.