Туман ҳокимлиги томонидан “Шаршара” тантаналар саройида ўтказилган тадбир “Ҳеч ким меҳр ва эътибордан четда қолмайди!” шиори остида ўтди ва унга туманимизда истиқомат қилаётган имконияти чекланган юртдошларимиз таклиф этилдилар. Тадбирда туман ҳокими Ғанижон Солиев, туман прокурори Акмалжон Мухтаров, туман ИИБ бошлиғи Фахриддин Ҳайитов, “Нуроний” жамғармаси туман бўлими раиси Машрабжон Ҳурбоев, “Инсон” ижтимоий хизматлар маркази туман бўлими вакиллари ҳамда кенг жамоатчилик иштирок этдилар. Туман ҳокими тадбир қатнашчиларини байрам билан самимий муборакбод этиб, мамлакатимизда имконияти чекланган фуқаролар учун яратилаётган кенг имкониятлар Президентимиз сиёсатида алоҳида ўрин тутаётганини таъкидлади. Тўкин дастурхон атрофидаги байрам иштирокчиларига туман Маданият бўлими ҳофизлари ижро этган қўшиқлар юқори кайфият улашди.